Байгалийн ухааны баг

БРУНЕЙ

/Брунейдар Уссалам улс/ Утасны код – 673

Бруней улс нь зүүн өмнөд Азид Борногийн /Калимантан/ аралд оршдог. Зүүн урд, баруун талаараа Малайз улстай хиллэх бөгөөд хойд талаараа Өмнөд хятадын тэнгистэй хиллэнэ.

Газар нутаг: 5770 км2 газар нутагтай.

Нийслэл хот: Бандар сери - Бегаван

Хүн ам: 375 мянган хүнтэй.

Нийт хүн амын  73 хувь нь малай, 20 хувь нь хятад үндэстэн байдаг. Түүнээс гадна тус оронд 4000 энэтхэгчүүд, 3000 англичууд болон бусад үндэстэн амьдардаг. Нийт хүн амын 67 хувь нь хот суурин газар амьдардаг. Дундаж наслалт эрэгтэй 70, эмэгтэй 73 наслана.

Албан ёсны хэл: Малай, Англи, Хятад

Шашин шүтлэг: Лалын шашинг 60 хувь, Будда шашинг 15 хувь, Христийн шашинг 10 хувь нь шүтдэг.

Засаг захиргааны байдал: Тус улс дотроо 4 тойрогт хуваагддаг.

Төрийн байгууламж: Бруней улс нь хаант засагтай бөгөөд төр засгийн тэргүүнээр Султан хаан өргөмжлөгддөг. Хууль тогтоох зөвлөл 20 жилд анх удаагаа хааны томилсон 21 гишүүнтэйгээр 2002 оны 9-р сарын 23-нд хуралдсан ба үндсэн хуулиндаа өөрчлөлт оруулж зөвлөл 45 гишүүнтэй байх болж 15 нь сонгогдох болов.

Бруней улсын хөгжил цэцэглэлтийн үндэс нь газрын тосны болон байгалийн хийн олборлолт, экспорт юм. Мөн цэвэр каучук үйлдвэрлэдэг. Амра жимс болон наргил мод тариалахас гадна одос, гахай, ямаа өсгөн үржүүлдэг. Нэхмэл, мөнгөн эдлэл дархлах болон нарийн мужааны үйлдвэрлэл хөгжсөн. 2525 км хатуу хучилттай замтай.

Мөнгөн тэмдэгт нь : Бруней доллар /Б.Д/ 1 Б.Д =0.67 ам.доллартай тэнцэнэ.

Нэг хүнд оногдох ҮНБ: 23700 ам доллар

Уур амьсгал ба ан амьтад:  Бруней улс нь далайн эргийн халуун дулаан чийглэг уур амьсгалтай бүсэд багтдаг. Жилийн дундаж хэм нь 26 градус. Хамгийн өндөр цэг нь Букит- пагон уул 1850м юм. Бүх газар нутаг нь ойт хээрийн бүсэд багтана. Газар нутгийн 75 хувийг нь халуун орны чийглэг ой эзлэх бөгөөд далайн эрэг хавийн нутгаар амра жимсний ширэнгэн ой үргэлжилнэ. Бруней ширэнгэ ойд олон төрлийн сармагчин, шувуу маш элбэг байдаг.  

Түүх соёлын дурсгал: Тус улсын нийслэлд сүндэрлэж буй дэлхийд гайхагдсан лалын сүмүүдийн нэг болох Омар Али Санфуддин мөн Брунейн Султаны ордон хосгүй гайхамшгаараа алдартай.

Эх сурвалж : Дэлхийн улс орнууд, Юрий Кручкин, УБ 2007 он.

 Санал хүсэлтээ сэтгэгдэлээр үлдээнэ үү.