Байгалийн ухааны баг

ВЬЕТНАМ

/Бүгд Найрамдах Социалист Вьетнам Улс/ Утасны код – 84

Вьетнам улс нь Ази тивийн зүүн өмнөд хэсэгт Энэтхэг – Хятадын хойгт оршдог. Хойд талаараа БНХАУ, баруун талаараа Кампучи, Лаос улстай тус тус хиллэж зүүн болон урд хэсгээрээ өмнөд хятадын тэнгисрүү түрж орсон байдаг.

Газар нутаг: 331.6 мянган км2 газар нутагтай.

Хүн ам: 84600 мянган хүнтэй.

Нийт хүн амын  87 хувийг вьетнам, 6 хувийг хятад үндэстэн эзэлнэ. Мөн тус оронд 70000 мыонг, 680000 кхмер, 400000 мео, 300000 зао зэрэг үндэстэн амьдардаг. Хилийн чанадад БНХАУ, АНУ, ОХУ, Лаос, Кампучи зэрэг орнуудад 6 сая Вьетнамчууд амьдардаг. Нийт хүн амын 22 хувь нь хот суурин газарт оршин сууна. Дундаж наслалт нь эрэгтэй 63, эмэгтэй 65 наслана.

Албан ёсны хэл: Вьетнам

Шашин шүтлэг: Буддын шашин шүтдэг. Мөн Күнзийн сургаалтай.

Засаг захиргааны байдал: 59 мужид хуваагдах бөгөөд гурван том гол хоттой. Нийслэл хот Ханой /3200 мянган хүн/. Томоохон хотуудад Хо ши мин /Сайгон / - 4100 мянган хүн, Хайфон – 1600 мянган хүн, Дананг – 500 мянган хүн, Хюэ – 320 мянган хүн зэрэг хотууд багтдаг. Хонихо, Меконг голуудын бэлчир сав газарт хүн амын 90 хувь нь амьдардаг. Эдгээр голын орчимд хүн амын нягтрал их бөгөөд нэг км2 нутагт 1500 оногдож байгаа нь дэлхийн хамгийн өндөр үзүүлэлт гэж тооцогддог.  

Төрийн байгууламж: Вьетнам нь Бүгд Найрамдах Социалист улс бөгөөд төрийн тэргүүн нь ерөнхийлөгч, засгийн газрын тэргүүн нь ерөнхий сайд байдаг. Хууль тогтоох дээд байгууллага нь нэг танхимт үндэсний хурал.

Вьетнам улс нь эдийн засгийн дунд зэргийн хөгжил бүхий хөдөө аж ахуй, аж үйлдвэрийн орон юм. Хөдөө аж ахуйн салбарт зонхилох үүргийг цагаан будааны аж ахуй гүйцэтгэдэг бөгөөд вьетнамчууд жилд 2 удаа ургац хураадаг. Мөн эрдэнэ шиш, маниок, джут, каучукын ургамал, шар буурцаг, чихрийн нишингэ, тамхи, хөвөн, цай зэргийг тариалдаг. Үүний зэрэгцээ гадил, нимбэг, жүрж зэрэг жимсний цэцэрлэг ихээр байгуулдаг. Тус оронд үхэр, одос, гахайн аж ахуйг голлон эрхэлдэг. Чулуун гүүрс, цагаан тугалга, вольфрам, төмрийн хүдэр зэрэг ашигт малтмал олборлодог. Тус орон нь ихээхэн хэмжээний ган, ширэм хайлуулдаг бөгөөд төрөл бүрийн хөдөө аж ахуйн машин, бага оврын усан лнгоц, оёдлын машин, цаг, унадаг дугуй зэрэг бүтээгдэхүүн үйлдвэрлэж, экспортлодог юм. Эрдэс, бордоо, хүчил, цемент, цаас зэрэг чиглэлээр химийн үйлдвэр хөгжсөн. Мөн өргөн хэрэглээний эд зүйлийн болон гар үйлдвэрлэл, сүүлийн жилүүдэд эрчимтэй хөгжиж байгаа орон юм. Төмөр зам 2600 км. 93300 км авто замтайгаас 23418 км нь хатуу хучилттай.  

Мөнгөн тэмдэгт нь : Донг /Д/ 10Д =0.92 ам.доллартай тэнцэнэ.

Нэг хүнд оногдох ҮНБ: 2700 ам доллар

Уур амьсгал ба ан амьтад:  Тус улсын газар нутаг нь далай орчмын халуун дулаан, чийглэг уур амьсгалтай бүсэд багтдаг. Жилийн дундаж хэм нь 25 градус. Өргөн хөндий бүхий уулархаг нутагтай. Хамгийн өндөр цэг нь Фан- си Пан уул бөгөөд 3144м юм. Далайн эрэг хавиараа нам дор тэгш газартай. Томоохон голуудаас Хонгха /улаан/, Меконг мөрөн зэргийг нэрлэж болно. Газар нутгийн 30 орчим хуьд халуун орны мөнх ногоон ой ургана. Уулархаг нутгаар туулайн бөөр, царс болон эвэрлэг мод, нарс ургана. Халуун бүсийн орны гол амьтад болох олон зүйлийн сармагчин, матар, заан, могой, гүрвэл, баавгай, буга, бух гөрөөс зэрэг амьтад байдаг. Шувуудаас тогос, бүргэд, хөх дэглий, нугас, галуу, ятуу зэргийг нэрлэж болно.  

Түүх соёлын дурсгал: Ханой дахь Хоан-Кием нуур болон яст мэлхийн буддын сүм, Хюэ дэх хааны ордон, Нхатранге дахь VII –XI зууны үеийн буддын сүм дацангууд, Хо ши мин дахь Гиак ламын цогчин дуган зэрэг түүх сочёлын дурсгалт газрууд олон бий.

Ханой дахь Монгол Э.С.Я: 84-4-84453009            Факс: 84-4-8454954

Э-шуудан: mongembhanoi@hn.vnn.vn

Улаанбаатар дахь Вьетнамын Э.С.Я: Утас: 454632, 458917, Факс: 458493

Эх сурвалж : Дэлхийн улс орнууд, Юрий Кручкин, УБ 2007 он.